Ֆիզմաթ դպրոցի օլիմպիական խմբակների հզորացումը ի սկզբանե եղել է «Ֆիզմաթ դպրոցի բարեկամ» բարեգործական հիմնադրամի առաջնահերթություններից մեկը։ Դեռևս 2025թ. մայիսին հիմնադրամի Հոգաբարձուների խորհրդի հաստատմանը ներկայացվեց օլիմպիական խմբակների աջակցության ծրագիրը, որը միտված է ապահովելու շարունակական զարգացում և արդյունավետ մասնագիտական միջավայր։
Ծրագրով իրականցվում են խմբակների հզորացմանն ուղղված մի շարք համակարգային քայլեր՝
- խմբակավարների համար հոնորարների ավելացում,
- ֆիզիկա, մաթեմատիկա, ինֆորմատիկա և աստղագիտություն առարկաների համար խմբակների ծրագրերի և մեթոդական ուղեցույցերի մշակում,
- միջազգային օլիմպիադաներում մեդալների նվաճումների պարագայում պարգևավճարների քաղաքականության ներդրում և իրականացում,
- սովորողների՝ միջազգային օլիմպիադաներին մասնակցության աջակցություն (ճանապարհածախս, կեցության և այլ անհրաժեշտ ծախսեր)։
Տեսանելի արդյունքներ արդեն առաջին տարում
Արդյունքները երկար սպասեցնել չտվեցին։ Արդեն 2025թ. սեպտեմբերին Ֆիզմաթ դպրոցում օլիմպիական ամսական պարապմունքների թիվը զգալիորեն աճեց՝ նախորդ տարվա 15-ի փոխարեն դառնալով 29։
Հիմնադրամի աջակցությունը հնարավորություն է տվել օլիմպիական խմբակների պարապմունքները սկսել ավելի վաղ տարիքից․ ըստ այդմ այս տարի օլիմպիական խմբակներ ձևավորվել են յոթերորդ դասարանից սկսած իններոդ դասարանից մեկնարկելու փոխարեն։
Այս մոտեցումը ոչ միայն բարձրացրել է ներգրավվածությունը, այլև նպաստել է ներառական կրթական միջավայրի ձևավորմանը․ օլիմպիական խմբակներ հաճախող սովորողների թիվը աճել է մոտ 40%-ով։
Նոր համագործակցություններ և մասնագիտական ներուժ
Ծրագրի կարևոր ձեռքբերումներից մեկն այն է, որ Նաիրի Սեդրակյանը նույնպես միացել է դասավանդողների թիմին և հեռավար կվարի պարապմունքներ՝ չնայած Հայաստանից դուրս գտնվելու հանգամանքին։ Վերջինս մեծ ավանդ ունի ՀՀ-ում և միջազգային ասպարեզում մաթեմատիկական գիտությունների զարգացման ասպարեզում։ Երկար տարիներ հանդիսացել է Հայաստանը մաթեմատիկայի միջազգային օլիմպիադայում ներկայացնող թիմերի մարզիչ, մաթեմատիկայի միջազգային օլիմպիադայի ժյուրիի և խնդիրների ընտրման կոմիտեի անդամ, Ժաուտիկովյան միջազգային օլիմպիադայի ժյուրիի անդամ։ Նաիրի Սեդրակյանի անվամբ է կոչվում իր ձևակերպած Սեդրակյանի անհավասարությունը։
Համագործակցության այս ձևաչափը հնարավորություն կտա սովորողներին օգտվել միջազգային փորձից՝ անկախ աշխարհագրական սահմաններից։
Բացի այդ մեկ այլ կարևոր ձեռքբերում է «Ֆիզմաթ դպրոցի բարեկամ» բարեգործական հիմնադրամի և «Քառակուսի» կրթական հիմնադրամի միջև ձևավորված համագործակցությունը, որի շրջանակում Սմբատ Գոգյանը միացել է օլիմպիական խմբակներում դասավանդող մասնագետների թիմին։
Ծրագիրն իրականացվում է Global Entrepreneurship Foundation, Krisp և Onex ընկերությունների աջակցությամբ։ Այս համագործակցությունը միավորում է կրթական, տեխնոլոգիական և բարեգործական ոլորտների ջանքերը՝ նպաստելով Հայաստանի ապագա օլիմպիական հաջողություններին։